*所有運費 順豐到付

《大清亡國關慈禧蛋牛治》
這是一本利用廣東話母語通俗語寫成的晚清近代史讀物。
西太后慈禧長期被人用枝筆抹黑，我就用枝筆同佢平反。一個有智慧有手段有能力的執政者，被歷史誤導為一個封建保守、禍國殃民的低智旺角行人專用區跳舞大媽阿嬋。十九世紀中葉，大清政權根本半隻腳行入棺材，慈禧居然有辦法將依個肺Can三期病人續多48年陽壽，剩係咁，已經要為佢平反再平反！本書除了寫晚清歷史，也寫現今香港和中國，借古讚今，務求通過百多年前的歷史借鏡，令讀者重新審視自己中國人的身份和內容。

《中國一百年前的第一次開放改革》
一九七九年，中國總結界師鄧小平先生推行開放改革，徹底放棄共產主義馬列毛思想，硬行極權資本主義市場經濟；從此以後，中國真正彈起來大躍進，由一個一窮二白嘅共產主義國家，變成一個強國之中嘅強國，發展到而家，甚至同美國平起平坐，美國仲要視中國為假想敵。呢個成就，其實前無古人，後無來者就唔知喇。
但係開放改革，早響百九幾年前，十九世紀最後兩年已經有人做緊，嗰個人叫慈禧太后，嗰場改革叫戊戌變法，或叫百日維新。
《中國一百年前的第一次開放改革》亦即【常威近代史】嘅第二部，喺呢本書入面，承接第一部《大清亡國關慈禧蛋牛治》，歷史繼續嚮前行，大清帝國打輸甲午戰爭，終於要搞大改革，一場戊戌變法，百日維新，背後隱藏住一個大陰謀，至於個陰謀係乜？請大家睇落去。
本書第二部份，係講清帝國一段最黑暗嘅歷，義和團事件同八國聯軍入京，清帝國亡黨亡國，慈禧太后西逃，踏入20世紀第一年，清帝國差不多全盤崩潰，究竟係邊個將呢個古老大帝國延續多十年陽壽？要去到1911年先俾我哋嘅國父孫中山推翻呢？

《東方維多利亞女皇之死》
「常威近代史系列」第三部《東方維多利亞女皇之死》，主要內容有兩個部份，分別係「日俄戰爭」（1904-1905）同「太后之死」；前者敘述一場發生喺清國境內、兩個帝國主義國家為咗爭奪清國利益嘅生死大戰。日俄戰爭亦都係「第一次世界大戰」嘅前奏曲，有人稱之為「第零次世界大戰」，戰爭嘅規模、戰略戰術嘅採用、戰爭裝備，都預示咗人類20
世紀上半部所有驚天災難嘅開端。
原本響我嘅歷史寫作計劃裡面，並冇打算詳細講日俄戰爭，畢竟成場戰爭與中國人關係不大，中國人只係一隻可憐嘅塘邊鶴。但係經過深思熟慮，呢場戰爭其實係之後好多事情嘅起點，所以不得不寫。
日俄戰爭後，就係慈禧太后生命嘅最後階段。1902 年八國聯軍入京後，庚子條約簽訂，慈禧太后重掌大權；喺佢生命嘅最後日子，不遺餘力，積極帶領清帝國步向真正現代化。大清帝國最後幾年，其實經濟發展良好，帝國燃點起新希望，慈禧太后甚至喺死前，想實行政改，將帝國帶上君主立憲之路。可惜時不利兮，命運冇畀佢更多嘅時間。1908 年慈禧太后死後，大清失去楝樑支柱，喺1912壽終正寢，之後就係長達半個世紀嘅大分裂狀態，天翻地覆，生靈塗炭，但已是後話。
慈禧太后，其實係一個能幹而且偉大嘅女人，稱佢為「東方維多利亞女王」，一啲都唔過譽。反而喺佢死後，過譽嘅人，充斥住整個中國近代史。